រួមគ្នាការពារព្រៃឡង់

សេចក្តីអំពាវនាវ

រួមគ្នាការពារព្រៃឡង់

                                                                 រាជធានីភ្នំពេញ, ថ្ងៃទី ០៨ ខែ វិច្ឆិកា ឆ្នាំ ២០១១

ដោយឃើញថាព្រៃឡង់ គឺជាព្រៃឈើ ដែលមានទំហំធំជាងគេនៅក្នុងប្រទេស​កម្ពុជាយើង ហើយហ៊ុំព័ទ្ធ ខេត្តចំនួនបួនមាន ខេត្តកំពង់ធំ ព្រះវិហារ ក្រចេះ និងខេត្ត​ស្ទឹងត្រែង។​ព្រៃនេះសំបូរទៅដោយដើមឈើធំៗ មានអាយុកាលរាប់រយឆ្នាំ ដែលមាន ប្រភេទ ព្រៃផ្សេងៗគ្នា មាន ព្រៃស្រោង ព្រៃពាក់កណ្ដាលស្រោង និងព្រៃរបោះ។​ ព្រៃទាំងនេះមាន សារៈសំខាន់​ចំពោះ​ប្រទេសជាតិ ទាំងមូល ជាពិសេសប្រជាជន ដែលរស់នៅតំបន់ជិតព្រៃនេះ ដែលអាស្រ័យ​ដោយផល និងអនុផលរបស់វា។ លើសពីនេះទៅទៀតព្រៃឡង់ មានតំលៃខាង ប្រព័ន្ធជីវសាស្រ្ត​ខ្ពស់បំផុត ហើយវាជាទីជម្រករបស់ពូជសត្វកម្រ និងជិតផុតពូជចំនួន២៧ប្រភេទ រួមទាំងដើមឈើ​ប្រណីត​ធំៗ ចំនួន២០ប្រភេទ ហើយវាក៏ជាទីជំរកសំខាន់ សម្រាប់សត្វគ្រប់ប្រភេទ។

ក៏ប៉ុន្តែសព្វថ្ងៃ​នេះ​ព្រៃឡង់កំពុងទទួលរងនូវការកាប់បំផ្លាញយ៉ាងធ្ងន់ធ្ងរ​ ដូចនេះក្នុងនាម​យើង​​ជាយុវជនខ្មែរ សូមចូលរួមថែរក្សាការពារ នូវធនធានធម្មជាតិដ៏មានតំលៃនេះ ឲ្យនៅគង់វង្ស​សម្រាប់ ជាប្រយោជន៏ដល់កូនចៅជំនាន់ក្រោយ ហើយថ្ងៃនេះ យើងខ្ញុំតំណាងឲ្យ ប្រជាពលរដ្ឋ​  ក៏ដូចជាយុវជនខ្មែរ ដែលស្រលាញ់នូវធនធានធម្មជាតិ សូមធ្វើការបួងសួងក្នុងគោលបំណង៖

Ø  ផ្សព្វផ្សាយពីអត្ថប្រយោជន៏ និងផលប៉ះពាល់នៃព្រៃឡង់

Ø  បង្កើនស្មារតីក្នុងការចូលរួមថែរក្សាការពារព្រៃឡង់

Ø  បញ្ឈប់រាល់ការកាប់បំផ្លាញព្រៃឡង់

ដោយយោងឃើញថា ព្រៃឡង់គឺជាព្រៃ ដែលមានគុណប្រយោជន៏យ៉ាង​ធំធេង​ដូចបាន​រៀបរាប់ខាងលើ យើងខ្ញុំសូម ផ្ញើសារនេះ​ជូនទៅដល់ស្ថាប័នពាក់ព័ន្ធ ឲ្យចូលរួមចំនែក​ក្នុងកិច្ច​ការពារ​ធនធានធម្មជាតិ ដែលជាប្រយោជន៍ ដ៏យូរអង្វែងទៅថ្ងៃអនាគត់។

          ក្នុងនាមយើងខ្ញុំជា យុវជនសូមអំពាវនាវដល់ប្រជាពលរដ្ឋ​ និងស្ថាប័នពាក់ព័ន្ឋទាំងអស់​ចូលរួមក្នុង ការថែរក្សាការពារព្រៃឡង់ ដែលជាព្រៃរបស់យើងទាំងអស់គ្នា។