ដោយ ទីន ហ្សាការីយ៉ា 2012-02-01
សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នឹងបញ្ជូននិស្សិតច្បាប់ទៅប្រកួតប្រជែងមុខវិជ្ជា «ច្បាប់អន្តរជាតិ» នៅសហរដ្ឋអាមេរិកនាពេលខាងមុខ។
២៣-តុលា-២០១១៖ និស្សិតខ្មែរទាំង ៥នាក់
ដែលសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច
នឹងបញ្ជូនទៅប្រកួតប្រជែងមុខវិជ្ជា «ច្បាប់អន្តរជាតិ»
នៅសហរដ្ឋអាមេរិក។
និស្សិតពូកែមួយក្រុមនេះនឹងត្រូវរួមគ្នាល្បងសមត្ថភាពជាមួយនឹងនិស្សិត ១០០ក្រុមដែលមកពី ៨០ប្រទេសផ្សេងទៀត។
និស្សិតសាលាច្បាប់ចំនួន ៥នាក់
នឹងទៅចូលរួមប្រកួតប្រជែងអំពីនីតិអន្តរជាតិសាធារណៈនៃកម្មវិធីThe Jessup International Moot Court នៅទីក្រុងវ៉ាស៊ីនតោន (Washington DC) សហរដ្ឋ អាមេរិក នៅថ្ងៃទី២៥ ដល់ថ្ងៃទី៣១ ខែមីនា ឆ្នាំ២០១២ ខាងមុខ។
បេក្ខជនមួយរូបក្នុងចំណោម ៥រូប ឈ្មោះ អន ប៊ុនណារិទ្ធ បានឲ្យដឹងនៅថ្ងៃទី៣១ ខែមករា ថា ក្រុមពួកគាត់មានគ្នាចំនួន ៥នាក់ ក្នុងនោះមានស្ត្រី ២នាក់ នឹងទៅប្រកួតប្រជែងនឹងនិស្សិតបរទេសផ្សេងៗទៀត ដែលមកពីចំនួន ៨០ប្រទេសនៅលើសាកលលោក។
ប៊ុនណារិទ្ធ បញ្ជាក់ថា ការប្រកួតប្រជែងអំពីនីតិអន្តរជាតិសាធារណៈនេះ គឺផ្ដោតលើបញ្ហាមួយចំនួន ដូចជាការវាយកម្ទេចប្រាសាទបុរាណ កិច្ចអន្តរាគមន៍លើបញ្ហាមនុស្សធម៌ និងការទទួលខុសត្រូវរបស់រដ្ឋាភិបាលជាដើម។
កញ្ញា ម៉ែន វុឌ្ឍិការណ៍ ដែលនាងគ្រោងនឹងទៅចូលរួមប្រកួតប្រជែងដែរនោះ មានប្រសាសន៍ថា ការប្រកួតប្រជែងនៅសហរដ្ឋអាមេរិកនោះ គេនឹងរៀបចំសវនាការប្រឌិតមួយដើម្បីឲ្យក្រុមនីមួយៗ ដែលមានប្រមាណជាង ១០០ក្រុម ធ្វើជាដើមបណ្ដឹង និងចុងចំលើយ ដើម្បីតតាំងគ្នារវាងភាគីដើមបណ្ដឹង និងភាគីចុងចំលើយនៅក្នុងសវនាការអំពីនីតិអន្តរជាតិសាធារណៈនោះ។
បេក្ខជនទាំង ៥នាក់ មានឈ្មោះ អន ប៊ុនណារិទ្ធ អន ប៊ុណា វណ្ណ យុវទេព កញ្ញា ម៉ែន វុឌ្ឍិការណ៍ និងកញ្ញា ង៉ូវ ម៉ុយស៊ឺ។ និស្សិតច្បាប់ទាំង ៥នាក់នេះ ជានិស្សិតដែលគេជ្រើសរើសក្នុងចំណោមនិស្សិត ៨០នាក់ផ្សេងទៀត ដែលក្រសួងយុត្តិធម៌បានរៀបចំប្រលងកាលពីខែសីហា ឆ្នាំ២០១១ បន្ទាប់ពីគេបានបង្កើតតុលាការសិប្បនិម្មិតមួយ ដើម្បីធ្វើការប្រកួតប្រជែងអំពីការយល់ដឹងច្បាប់អន្តរជាតិទាក់ទង នឹងច្បាប់សង្គ្រាមជាដើម។
កញ្ញា ម៉ែន វុឌ្ឍិការណ៍ និងនិស្សិត អន ប៊ុណារិទ្ធ អ្នកទាំងពីរ ក្រៅពីសិក្សាច្បាប់ជាភាសាអង់គ្លេសនៅសាកលវិទ្យាល័យភូមិន្ទ វិទ្យាសាស្ត្រសេដ្ឋកិច្ច ពួកគេក៏សិក្សាភាសាអង់គ្លេសនៅវិទ្យាស្ថានភាសាបរទេស ហៅថា (IFL)។ អ្នកទាំងពីរមានគោលបំណងចង់ធ្វើជាមេធាវីនៅពេលអនាគត។
ទោះជាយ៉ាងណា ពួកគេបានសម្ដែងសុទិដ្ឋិនិយមចំពោះការទៅចូលរួមប្រលងប្រកួតប្រជែង នៅសហរដ្ឋអាមេរិកនោះថា ពួកគេនឹងទទួលបានជោគជ័យលើគូប្រជែងជាង ១០០ក្រុម ដែលមកពី ៨០ប្រទេសផ្សេងទៀត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែ ប៉ុណ្ណោះ។
No comments:
Post a Comment