ដោយ៖ ឯម ខេមរា
សមាគមនកសិករដើម្បីសន្តិភាព និងអភិវឌ្ឍន៍ (FAPD) សហព័ន្ធសហជីពកម្មករ និយោជិតវិស័យទេសចរណ៍ និងសេវាកម្មកម្ពុជា (CTSWF) សមាគមមន្ត្រីរាជការឯករាជ្យកម្ពុជា (CICA) និងសហព័ន្ធសហជីពកម្មករសំណង់ និងព្រៃឈើកម្ពុជា BWTUC។ នៅព្រឹកថ្ងៃទី ១០ ខែកុម្ភៈ ឆ្នាំ២០១២ បានចុះចែកគ្រឿងឧបភោគបរិភោគដល់អតីតប្រជាពលរដ្ឋបុរីកីឡា ប្រមាណ ១០០គ្រួសារ ដែលគ្មានផ្ទះសំបែង បន្ទាប់ពីត្រូវបានបណ្តេញចេញដោយក្រុមហ៊ុន ផាន អ៊ី មិច កាលពីថ្ងៃទី ២-៣ ខែមករា ឆ្នាំ២០១២។
គ្រឿងឧបភោគបរិភោគដែលចែកជូននេះ គឺបានមកពីកម្លាំងសាមគ្គី របស់សមាជិកសមាគម និងសហព័ន្ធសហជីពនានារបស់សហភាពការងារកម្ពុជា (CLC) និង បុគ្គលិកដែលមានចិត្តអាណិតអាសូរដល់ ប្រជាពលរដ្ឋ ហើយបានចូលរួមវិភាគទានផ្ទាល់ខ្លួន បន្តិចបន្តួចដើម្បីទិញនូវសំភារៈឧបភោគបរិភោគតិចតួចស្តួចស្តើងទាំងនេះ ជូនដល់ពួកគាត់ដើម្បី សម្រួលដល់ ការរស់នៅក្រោយពីការបណ្តេញចេញដោយបង្ខំ ដែលធ្វើឱ្យពួកគាត់បានបាត់បង់នូវផ្ទះសំបែង សំភារៈប្រើប្រាស់ និងបាត់បង់នូវមុខរបរចិញ្ចឹមជីវិតប្រចាំថ្ងៃ។ ម្យ៉ាងវិញទៀត គឺដើម្បីបង្ហាញពីការលើកទឹកចិត្ត និងចូលរួមចែករំលែកសេចក្តីលំបាកវេទនាពីសំណាក់សហភាពការងារកម្ពុជាផងដែរ។
សំភារៈដែលចែកទៅដល់ពួកគាត់ក្នុងមួយគ្រួសារៗទទួលបានមួយកញ្ចប់រួមមានៈ អង្ករបីគីឡូក្រាម មី១០កញ្ចប់ ទឹកត្រី១ដប ទឹកស៊ីអ៊ី១ដប អំបិល១កញ្ចប់ ត្រីខ ២កំប៉ុង និងទឹកសុទ្ធ២ដប។
ប្រជាពលរដ្ឋរងគ្រោះម្នាក់ក្នុងចំណោមប្រជាពលរដ្ឋសហគមន៍បុរីកីឡា អ្នកស្រី ទូច វណ្ណា បានបង្ហាញពីទុក្ខលំបាកវេទនារបស់ខ្លួនថា “ ជីវភាពរស់នៅ របស់ពួកគាត់សព្វថ្ងៃមានការលំបាកណាស់ ព្រោះតែបាត់បង់ផ្ទះសំបែង គ្មានមុខរបរ ខ្វះទឹកប្រើប្រាស់ សូម្បីតែកូនចៅក៏មិនបានទៅរៀនសូត្រដែរ។ គាត់បានបន្ថែមទៀតថា “ យើងខ្ញុំសូមស្នើឱ្យដ្ឋាភិបាលជួយដោះស្រាយបញ្ហាបីចំណុចគឺៈ ទី១ សូមរដ្ឋាភិបាលជំរុញឱ្យក្រុមហ៊ុនគោរពតាមកិច្ចសន្យា។ ទី២ រដ្ឋាភិបាលដោះលែងអ្នកជាប់ពន្ធធនាគា។ ហើយនិង ទី៣ គឺឱ្យក្រុមហ៊ុនសងថ្លៃការខូចខាតដល់ពួកគាត់”។
 |
| រូបថតៈ ស ម៉ូរី |
លោក ស ម៉ូរ៉ា ប្រធានធានសហព័ន្ធសហជីពកម្មករចំណីអាហារ និងសេវាកម្មកម្ពជា (CFSWF) បានលើកឡើងថា “យើងមិនអាចទទួលយកបានទេនូវការរំលោភសិទ្ធិរបស់យើងទាំងអស់គ្នាបានទេ”។
លោកបានបន្តទៀតថា “ចលនាសហជីព នឹងចូលរួមជាមួយបងប្អូនទាំងអស់គ្នាដើម្បីលើកកម្ពស់ការគោរពសិទ្ធិមនុស្ស ហើយយើងនឹងចូលរួម និងគាំទ្រដល់បងប្អូនជានិច្ចនៅ ពេលមានអំពើអយុត្តិធម៌”។ លើសពីនេះទៅទៀត លោកបានបន្ថែមទៀតថា ”បងប្អូនមិននៅតែម្នាក់ឯងទេ គឺមានចលនាសហជីព និងប្រជាពលរដ្ឋដ៏ទៃទៀតចាំជួយបងប្អូន”។
 |
| រូបថតៈ ស ម៉ូរី |
ក្នុងឱកាសនោះដែរ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) បានមានប្រសាសន៍ថា “នេះគឺជាជំហានដំបូងដែលយើងបានចូលរួមចែករំលែកនូវទុកលំបាកទេវនារបស់បងប្អូន ហើយយើងនឹងជួយការពារនូវការរំលោភសិទ្ធិរបស់បងប្អូនតទៅទៀត”។ លោកបន្តថា “យើង ត្រូវមានការសាមគ្គីគ្នាដើម្បីការពារសិទ្ធិ និងការពារផលប្រយោជន៍ជូនប្រជាពលរដ្ឋខ្មែរគ្រប់ៗរូប ហើយយើងស្នើសុំឱ្យរដ្ឋាភិបាលដោះស្រាយបញ្ហារបស់ប្រជាពលរដ្ឋបុរីកីឡាដែលកំពុងរងទុក្ខវេនាទាំងនេះ”។
No comments:
Post a Comment